राष्ट्रिय महिला मादल वादन प्रतियोगिता आयोजना हुने
काठमाडौं । पहिलोपटक राष्ट्रिय महिला मादल वादन प्रतियोगिता आयोजना हुने भएको छ । कर्णाली कलाकार प्रतिष्ठानले बैशाख २७ गते राष्ट्रिय नाचघर जमलमा प्रतिस्पर्धा गर्न लागेको हो ।
संगीत तथा नाट्य प्रज्ञा प्रतिष्ठानको सहकार्यमा हुने प्रतियोगिताको उद्देश्य महिलाको अन्तरनिहित प्रतिभाको उजागर गर्नु र साथै मौलिक बाजा मादलको संरक्षण र विकास गर्नु रहेको उल्लेख छ ।
‘नारीको कला, नारीको शान’ भन्ने मूल नारासहित हुने प्रतियोगिताका लागि २५ गतेसम्म आवेदन दिन सकिने भएको छ । पहिलो हुनेलाई ५५ हजार, दोस्रोलाई ३५ हजार, तेस्रो हुनेलाई २५ हजार र सान्त्वना हुनेलाई १५ हजार रुपैयाँ पुरस्कार प्रदान गरिने भएको छ ।
आयोजित पत्रकार सम्मेलनमा यसबारे जानकारी दिइयो । अहिलेसम्म ४२ जनाले आवेदन दिएको कर्णाली कलाकार प्रतिष्ठानकी अध्यक्ष तथा प्राज्ञ टीका पुनले जानकारी दिइन् ।
प्रमुख अतिथिको चन्द्र शर्माले नेपालमा यस्तो प्रकृतिको प्रतियोगिता महिलाको हकमा प्रथम भएको र आयोजनाको आँट गरेकामा आयोजकलाई शुभकामना दिए ।
पत्रकार सम्मेलनमा प्राज्ञ पुनले गाउँमा महिलाको कार्यक्रममा पुरुषलाई मादल बजाउन बोलाउँदा नआउने समस्या रहेको बताइन् । ‘मेरी आमाले मादल किनेर आफै बजाउने प्रयास गर्दा बजाउन जान्नुभयो । त्यसपछि कसै सँगपनि झुक्न परेन’ उनले अनुभव सुनाइन् ।
Online Khabar
